Австралиялик 58 ёшли Фрэнк Скотт ўлимидан сўнг жасадини ўнлаб дафн қилинмаган жасадлар табиий йўл билан парчаланадиган полигонга топширишни васият қилди. Бу ҳақда Daily Mail хабар берди.
У Сидней технология университети ва Австралия ҳуқуқни муҳофаза қилиш органларининг қўшма тажрибасида иштирок этиш учун ёзилган. Айни вақтда тиканли тўсиқлар билан ўралган 4,8 гектарли ҳудудда 30 та дафн этилмаган жасад парчаланмоқда. Яна 15 та жасад турли чуқурликларга кўмилган. Олимлар танилмаган қолдиқларнинг шахсини аниқлаш ва жиноятларни фош этишда керак бўладиган маълумотларни олиш учун мазкур тажрибани ўтказмоқда.
Ўлимдан сўнг Скоттнинг жасади полигонда очиқ осмон остида қолдирилади. Ўн йилдан сўнг унинг қолдиқлари кремация қилинади ва Сидней технологик университетидаги ёдгорликка жойлаштирилади.
Скотт ўз танасини фан учун қурбон қилишга қарор қилган, чунки шифокорлар кўп марта унинг ҳаётини сақлаб қолган. У 15 ёшидан ҳарбий флотда ва армияда хизмат қилишни бошлаган. Скотт Шимолий Ирландиядаги қуролли низо вақтида жабрланган. Истеъфога чиққач, Reuters’да ҳарбий фотограф бўлиб ишлаган ва дунёнинг барча қайноқ нуқталарини кезиб чиққан.
Скотт 15 та юрак хуружини, кўп сонли операцияларни бошдан ўтказган. 2004 йилда Жануби-шарқий Осиёда юз берган цунами вақтида у меҳмонхонанинг учинчи қаватида бўлган ва тўлқин улоқтирган катер унга келиб урилган. Скотт қутқариб қолинган, бироқ ўпкасининг ярмидан айрилган.
Изоҳ (0)