Қирғизистон президенти Сўранбай Жээнбеков Ўзбекистон бош вазири Абдулла Арипов ҳамроҳлигида Мустақиллик майдонига ташриф буюрди. ЎзАнинг ёзишича, олий мартабали меҳмон Мустақиллик ва эзгулик монументи пойига гул қўйган.
«Мамлакатимизнинг бош майдонида қад ростлаган Мустақиллик ва эзгулик монументи Ўзбекистон танлаган йўл – мустақиллик, тинчлик ва тараққиёт тимсолидир. Ушбу монумент теран маъно-мазмуни, ғоявий-бадиий ечими билан Ўзбекистоннинг тинчликсевар сиёсатини, халқимизнинг бунёдкорлик ва фаровонлик йўлидаги эзгу интилишларини ўзида ифода этади», — деб ёзади ЎзА.
Хабар беришларича, Сўранбай Жээнбеков Мустақиллик майдони тинчлик, дўстлик ва эзгуликни тарғиб қилишда, ўзбек халқининг буюк келажакка ишончини мустаҳкамлашда муҳим аҳамиятга эга меъморий мажмуа эканини алоҳида таъкидлаган.
Аввалроқ Қирғизистон президенти Сўранбай Жээнбеков Тошкентдаги Ислом Каримов ҳайкали пойига гул қўйиб, Ўзбекистон Биринчи Президенти хотирасига ҳурмат бажо келтиргани ҳақида хабар берилган эди.
Жээнбеков Ўзбекистон Президенти Шавкат Мирзиёевнинг таклифига биноан 13 декабрь куни Ўзбекистонга расмий ташриф билан келди.
Изоҳ (0)