Россиянинг Астрахан вилоятидан ўтган «Астрахан — Маҳачқалъа» федерал трассасида 13 декабрь, чоршанба куни юз берган йўл-транспорт ҳодисаси оқибатида олти киши, жумладан, бир гўдак ҳалок бўлди. «ТАСС»нинг ҳудудий йўл полициясига асосланиб хабар беришича, яна уч киши тан жароҳатлари билан шифохонага ётқизилган.
Авария Москва вақти билан 9:00 да, Астрахан вилоятининг Икрянинский туманида юз берган, Hyundai Solaris автомобили Toyota Corolla билан тўқнашган.
«Дастлабки маълумотларга кўра, Toyota Corolla ҳайдовчиси бошқарувни йўқотиб, қарама-қарши қатнов қисмига чиқиб кетган ва Hyundai Solaris билан олдма-олд тўқнашган. Оқибатда олти киши, жумладан, 1—2 ёш атрофидаги бир гўдак ҳалок бўлган, уч киши шифохонага ётқизилган», — дейилади полиция баёнотида.
Ҳозирда қурбонлар ва жабрланувчиларнинг шахси аниқланмоқда. Ҳодиса жойида полиция ходимлари иш олиб бормоқда. Текширув ишлари бошланган, ҳодиса тафсилотлари ўрганилмоқда.
Изоҳ (0)