Ўзбекистон мусулмонлари идорасида Индонезия бош имоми билан учрашув бўлиб ўтди

7 декабрь куни Индонезиянинг Жакарта шаҳридаги «Истиқлол» жоме масжиди имом-хатиби Насаруддин Умар бошчилигидаги делегация диний идорага ташриф буюрди, деб хабар беради Ўзбекистон мусулмонлари идораси матбуот хизмати.

Меҳмонларни дин ишлари бўйича қўмита раиси Ортиқбек Юсупов, туризмни ривожлантириш давлат қўмитаси раиси Азиз Абдуҳакимов ва Ўзбекистон мусулмонлари идораси раиси, муфтий Усмонхон Алимов қабул қилди.

Мулоқотда муфтий Усмонхон Алимов сўз олиб, Ўзбекистон ва Индонезия ўртасидаги ҳамкорлик кўп йиллардан давом этиб келаётганини билдирди.

Учрашувда туризмни ривожлантириш давлат қўмитаси раиси А.Абдуҳакимов Индонезия билан туризм йўналишида жуда катта ишлар режалаштирилгани ҳақида сўзлади.

Биз Ўзбекистондаги зиёратгоҳларни кўриб ҳайратландик ва юқоридаги гаплардан илҳомланиб, албатта, мен Индонезиядаги Ўзбекистоннинг туризм соҳаси бўйича вакили бўлишга тайёрман. Бизда умра сафарлари айни пайтда Туркия орқали амалга оширилади. Зиёратчилар ушбу мамлакатда уч кун бўлишади. Агар юртингизни Туркия билан қиёслаш мумкин бўлса, мамлакатингизда жуда ҳам катта зиёрат туризми учун имконият бор. Айниқса, тарихий обидалар, осори атиқалар ва тарихий воқеаларнинг адоғи йўқ.

Насаруддин Умар, Индонезиянинг Жакарта шаҳридаги «Истиқлол» жоме масжиди имом-хатиби