Аргентинада мамлакатнинг собиқ президенти Кристина де Киршнерга нисбатан давлатга хиёнат қилганлик юзасидан айблов илгари сурилди, деб хабар беради «РБК».
Федерал судья Киршнерни 1994 йилда Буэнос-Айрес шаҳрида жойлашган яҳудийлар маданият марказида юз берган портлаш тўғрисидаги иш бўйича ҳибсга олишга чақирди.
Судья Киршнерни 85 киши ҳалок бўлган ҳужумда Эроннинг ролини «фойдали савдо келишуви» эвазига яширганликда айбламоқда.
Собиқ президентни ҳибсга олиш учун суд уни дахлсизлик ҳуқуқидан маҳрум этишни сўради. Ҳозирги вақтда Киршнер сенатор лавозимида фаолият юритмоқда.
Бундан ташқари, суд Киршнернинг уч нафар тарафдори ва ёрдамчисини, жумладан собиқ ташқи ишлар вазири Гектор Tимeрманни ҳибсга олган. У ҳозирда уй қамоғида эканлиги айтилмоқда.
Аргентина собиқ президенти суд қарорини «адолат ва демократияга тўғри келмайди», дея изоҳлаган.
«Бу ерда иш, жиноят, мотив йўқ. Худо буни билади, ҳукумат ва президент (Маурисио) Макри ҳам бундан хабардор», — дейди Кристина де Киршнер.
Изоҳ (0)