5 декабрь куни «Туркистон» саройида «Сен ёлғиз эмассан» жамғармасининг 15 йиллиги муносабати билан концерт дастури ўтказилди, деб хабар беради UzDaily.
Байрам дастури Халқ таълими вазирлиги, Соғлиқни сақлаш вазирлиги ҳамда Тошкент шаҳар ҳокимлиги билан ҳамкорликда ташкил этилди.
Концертда меҳрибонлик уйларининг 500 дан ортиқ тарбияланувчилари, шунингдек имконияти чекланган болалар иштирок этди. Байрам дастурида болаларнинг қобилиятини намоён этувчи чиқишлар тайёрланди.
Концертда болалар томонидан хоразмча, испанча рақслар ва қўшиқлар ижро этилди. Томоша якунида болалар «Сен ёнимда бўласан» деб номланган қўшиқни куйлади.
«Сен ёлғиз эмассан» жамғармаси 2002 йилда боқувчисини йўқотган ва имконияти чекланган болаларни ҳар томонлама қўллаб-қувватлаш мақсадида ташкил этилган.
Жамғарманинг 15 йиллик фаолияти мобайнида кам таъминланган оилаларнинг фарзандлари, ота-онасини йўқотган ва имконияти чекланган 10000 нафар болалар тиббиёт, таълим, ижтимоий мослашув ва юридик кўмак соҳаларида ёрдам олган.
Изоҳ (0)