АҚШ Ҳарбий-ҳаво кучлари Япониядаги Кадена авиабазасига жойлаштирилган F-35 қирувчи самолётларидан бирининг фюзеляж детали парвоз вақтида йўқолганини тан олди. Бу ҳақда «РИА Новости» хабар берди.
Ҳодиса Окинава шарқида 30 ноябрь, пайшанба куни бўлиб ўтган машғулотлар вақтида юз берган. Ўшанда бу ҳақда япон ОАВлари ёзган, бироқ АҚШ Ҳарбий-ҳаво кучлари бу маълумотни расман 4 декабрь, душанба куни тасдиқлаган.
Етакчи F-35 нинг тахминан 30 — 60 сантиметрли фюзеляж қисмининг йўқолишини у билан бирга парвоз қилган самолёт учувчиси қўнишга кириш вақтида пайқаб қолган. Қирувчилар парвозга чиқишдан олдин текширувдан ўтказилган, шунинг учун ҳарбийлар қисм самолётлар ҳавода бўлган вақтда йўқолган, деб тахмин қилмоқда. Йўқотилган қисмнинг ўрнини парвозлар хавфсизлиги учун йўқотишларсиз тўлдириш мумкин ёки йўқлиги ҳозирча номаълум.
F-35 Lightning II самолёти F-22 Raptor’дан кейин бешинчи авлодга мансуб иккинчи серияли қирувчи ҳисобланади. F-35 ни яратиш бўйича дастур АҚШга қарийб 500 миллиард долларга тушган. Самолётлар доимий равишда танқид остига олинади. Аввалроқ бир неча марта турли техник носозликлар ҳақида хабар берилган.
Изоҳ (0)