Венесуэла президенти Николас Мадуро 7 ноябрь, сешанба куни Диего Марадона билан футбол бўйича ўртоқлик учрашувида иштирок этди. Бу ҳақда Венесуэла ахборот агентлигига таяниб, «ТАСС» хабар берди.
Ўртоқлик учрашуви мамлакат пойтахти Каракас яқинидаги Фуэрте-Тиуна ҳарбий база майдонида бўлиб ўтди.
Мадуро 1986 йили футбол бўйича Аргентина терма жамоаси таркибида жаҳон чемпионлигига эришган Марадонага унинг Венесуэла собиқ президенти Уго Чавес билан тушган суратни, шунингдек, 10-рақам туширилган Венесуэла миллий терма жамоаси футболкасини совға қилди.
Август ойининг бошида аргентиналик футболчи Венесуэла раҳбарини қўллаб-қувватлаган эди. Шунингдек, у «империализмга қарши курашиш учун Венесуэла аскарлари формасини» кийишга тайёр эканлигини билдирганди.
Апрель ойидан буён Венесуэлада бир неча ой амалдаги ҳукуматга қарши норозлик намойишлари бўлиб ўтди. Бу вақт давомида 120 дан ортиқ одам ўлдирилди, минглаб намойишчилар жароҳат олди.
Изоҳ (0)