Украинада бир йил ичида икки марта яраланишга улгурган Адам Осмаев ҳужум тафсилотлари ҳақида гапириб берди. «LB.ua» нашрига берган интервьюсида у рафиқаси Амина Окуева воқеа жойида ҳалок бўлганига аниқлик киритди.
«Атрофимда ҳамма нарса ҳар тарафга учиб, сочилик кетди. Мен қўлимдан келганича юриб бордим, чунки ўқ двигателга теккан эди ва машина тўхтаб қолди. Аминага биринчи ёрдам кўрсатишга уриндим, аммо ўқ унинг бошига келиб текканди», — деди у.
Осмаевнинг қўшимча қилишича, у ҳодисани ўзига ва хотинига нисбатан суиқасд деб ҳисоблайди, у отишмада маълум бир террорчилик гуруҳи изини кўраётганини айтди.
30 октябрь куни Киев вилоятидаги Глеваха қишлоғи яқинида темир йўлни кесиб ўтиш жойида Осмаев бошқариб кетаётган автомобиль номаълум кимсалар томонидан ўққа тутилди. Бу Осмаевнинг иккинчи марта ўқ ёмғири остида қолиши — 1 июнь куни журналист қиёфасидаги киллер у билан «интервью» уюштириш чоғида унга қарата тўппончадан ўқ узган эди.
Осмаев 2012 йил бошида асли қозоғистонлик шериги Иля Пянзин билан биргаликда теракт тайёрлашда айбланиб, Одессада қўлга олинган. Кейинроқ Осмаев Владимир Путинга суиқасд тайёрлаганини тан олган. Пянзин Россияга экстрадиция қилинган бўлса, Осмаевнинг адвокатлари Европа Инсон ҳуқуқлари судига мурожаат қилиб, уни Украина ҳудудида олиб қолишга муваффақ бўлган эди. 2014 йил ноябрида Одесса суди Осмаевни ҳибсдан озод қилди.
Изоҳ (0)