Ксения Собчак номзодини Россия президентлигига илгари суришнинг уч варианти кўриб чиқилмоқда

Телебошловчи Ксения Собчакнинг штаби Россияда 2018 йилги президентлик сайловида уни номзод сифатида илгари суришнинг 3 вариантини кўриб чиқмоқда. Бу ПАРНАС ёки «Гражданская инициатива» партияларидан номзод, шунингдек, мустақил номзод сифатида қатнашиш имкониятларидир, дея хабар беради «РБК».

«ПАРНАС чиндан ҳам имзолар тўплаш жараёнини енгиллаштирган бўларди. Бироқ ҳозирда партия билан музокаралар олиб борилаётгани йўқ», — деди телебошловчи штаби раҳбари Игорь Малашенко.

ПАРНАС раиси Михаил Касянов ҳам партия Собчакнинг штабига шундай таклиф билан чиқмагани, ўз навбатида, телебошловчининг вакиллари ҳам партияга бу каби таклиф билан мурожаат этмаганини тасдиқлади.

«Гражданская инициатива» етакчиси Андрей Нечаев Собчак штаби билан номзодни илгари суриш масаласида «дастлабки алоқалар» бўлганини тан олди. Телебошловчи ҳозирда «икки партиядан бирини танлаётгани», у эса «ўз шартларини тайёрлаётгани»ни билдирди.

Сиёсий технологиялар мутахассиси Алексей Ситниковга кўра, Собчак мустақил номзод сифатида ўзини илгари суриши эҳтимоли «95 фоизга тенг» ва бу «ҳозирги кундаги ишчи вариант».

Журналист Антон Красовский барча вариантлар тенг кўрилаётгани, бу борада якдил қарорга келинмагани, муҳокамалар давом этаётганини маълум қилди.