КХДР бир нечта йўлдошларини учиришни режалаштирмоқда

Шимолий Корея бир нечта йўлдошларини орбитага чиқаришни режалаштирмоқда. Бу ҳақда «Корреспондент.net» хабар бермоқда.

Қайд этилишича, Пхеньян ўзининг беш йиллик космик дастурига мувофиқ бир нечта, жумладан стационар йўлдошларини учиради.

КХДР ўз режасини бу ҳаракат «одамлар ҳаётини яхшилаши» билан изоҳламоқда.

«Айрим мамлакатлар бизга қўлланилган санкциялар бўйича БМТ резолюцияларини манипуляция қилди ва КХДРнинг космик дастурига халақит берди. Бу эса йўл қўйиб бўлмайдиган ҳаракат», — дейилади хабарда.

Пхеньян шунингдек, бошқа суверен давлатлар сингари космик дастурни ривожлантириш ҳуқуқига эга эканлигини таъкидламоқда.

Ўз навбатида, мутахасислар КХДР томонидан режалаштирилган йўлдош учирилиши баллистик ракеталарнинг навбатдаги яширин синови бўлиши мумкинлигини тахмин қилмоқда.