Алмазбек Атамбоев Тошкентга учиб кетди
Қирғизистон президенти Алмазбек Атамбоев Ўзбекистонга давлат ташрифини амалга ошириш учун 5 октябрь куни Тошкентга учиб кетди. Бу ҳақда «АКИpress» хабар бермоқда.
ЎзА ахборотига кўра, Атамбоевнинг ташрифи давомида икки давлат раҳбарлари ўзаро манфаатли ҳамкорлик алоқаларини янада ривожлантириш истиқболларини муҳокама қилади, минтақавий ва халқаро сиёсатнинг долзарб масалалари бўйича фикр алмашади.
Давлат раҳбарлари Тошкент шаҳрида бўлиб ўтадиган Ўзбекистон ва Қирғизистон саноат маҳсулотлари кўргазмасига ташриф буюради.
Музокаралар якунлари бўйича Ўзбекистон ва Қирғизистон ўртасида Қўшма декларация қабул қилиниши кутилмоқда.
Ташриф доирасида турли соҳаларда ўзаро алоқаларни мустаҳкамлашга қаратилган қатор икки томонлама ҳужжатлар имзоланиши режалаштирилган.
