Аввал хабар берганимиздек, 2017 йил 4 октябрь куни Тошкент шаҳрида бўлиб ўтган Ўзбекистон Республикаси Олий Мажлиси Сенатининг ўн иккинчи ялпи мажлисида сенаторлар қарор қабул қилди, унга кўра Фуқароларнинг кафолатланган меҳнат ҳуқуқларини таъминлаш масалалари бўйича Парламент комиссияси тузилади.
Қарорга мувофиқ ҳукумат томонидан қишлоқ хўжалиги соҳасига бозор механизмларини, ҳозирги замон фан ва техника ютуқларини жорий этишни давом эттириш, қишлоқ хўжалигини механизациялаш даражасини ошириш, механизацияланган теримни кенг қўллаш учун шарт-шароит яратиб берадиган ҳамда қишлоқ хўжалиги соҳасини механизациялашдан максимал самара берадиган ғўзанинг янги навларини етиштириш, шунингдек, жалб этилаётган мавсумий ишчиларни иқтисодий жиҳатдан рағбатлантиришнинг турли усулларини ишлаб чиқиш, бу соҳадаги меҳнат муносабатларини тартибга солиш бўйича таклифлар ишлаб чиқиш юзасидан комплекс чора-тадбирлар кўрилади.
«Газета.uz» ёзишича, 2016 йилги ҳосилдан бошлаб, беш йил давомида пахта далалари майдонини 185 минг гектарга ёки 14,5 фоизга қисқартириш режалаштирилмоқда. Бу ҳақда Қишлоқ ва сув хўжалиги вазири ўринбосари, Ўзбекистон қишлоқ хўжалик илмий-ишлаб чиқариш маркази бош директори Шуҳрат Тешаев айтиб ўтди.
Унинг сўзларига кўра, ғўзадан бўшаган ерларга сабзавот экинлари, шу жумладан, картошка, ем-хашак экинлари ва мой берадиган ўсимликлар экилади, интенсив боғлар ва узумзорлар барпо этилади.
«Натижада 2020 йилга келиб, мева-сабзавот маҳсулотлари, узум ва полиз экинлари ишлаб чиқаришни камида 2,3 марта кўпайтириш кўзда тутилган. Уч йил ичида қишлоқ хўжалик маҳсулотлари экспорти 3 марта ўсиши керак», — деди вазир ўринбосари.
Изоҳ (0)