Бразилиянинг учта жанубий штати 7 октябрь куни фуқаролар билан 2018 йилда мустақиллик референдумини ўтказиш бўйича маслаҳатлашув ўтказишни режалаштирмоқда. Бу ҳақда Sur Libre («Озод Жануб») ҳаракати етакчиларидан бири Селсо Деушер «РИА Новости»га маълум қилди.
«Биз ресурсларнинг оғир йўқотилишини бошдан кечирмоқдамиз ва доим солиқларинг ёмон тақсимланишига дуч келмоқдамиз. Бюджетдаги доимий дискриминация жанубий ҳудудларни деярли йўқлик даражасига тушириб қўймоқда, бу эса бизни Бразилия раҳбарлиги остидаги келажакка бўлган умидимизни сўндирмоқда», — деди Деушер.
Гап Бразилиянинг учта штати — Санта-Катарина, Парана ва Риу-Гранди-ду-Сул ҳақида кетмоқда, уларнинг аҳолиси 29 миллион кишини ташкил этади. Хабар берилишича, ушбу штатларда аҳоли жон бошига тўғри келадиган даромад Бразилияда энг юқори эканлиги қайд этилган.
«Озод Жануб» ҳаракати 1992 йилда Санта-Катарина штати таркибига кирувчи Лагуна шаҳрида пайдо бўлган, кейинчалик унга бошқа икки штат ҳам келиб қўшилган. Ҳаракатнинг энг катта эришган ютуғи 2016 йилда аҳоли ўртасида (500 минг киши иштирок этган) сўров ўтказилишининг ташкиллаштирилиши бўлган. Сўровда иштирок этганларнинг 95 фоизи ушбу жанубий учта штат ўзаро бирлашиб, Бразилия таркибидан чиққан ҳолда алоҳида давлат тузиши лозимлигига овоз берган.
Изоҳ (0)