Эрон янги «Хоррамшаҳр» баллистик ракетасининг синови муваффақиятли якунланганини маълум қилди. Ракета учирилиши тасвирланган видео Press TV телеканали сайтига жойлаштирилди, деб хабар берди «РБК».
Аввалроқ, 22 сентябрь куни ушбу ракета биринчи бор Теҳрондаги ҳарбий парадда намойиш этилганди. Янги баллистик ракета 2 минг километр масофани босиб ўтишга мўлжалланган. Шунингдек, у бир нечта жанговар каллакларни ташишга қодир.
Ҳарбий парадни Эрон президенти Ҳасан Руҳоний ҳам кузатган. Унинг маълум қилишича, Эрон кейинчалик ҳам ўзининг ҳарбий салоҳиятини ривожлантиришни давом эттиради ва бошқа мамлакатлар бунга тўсқинлик қила олмайди. Руҳонийнинг таъкидлашича, Эрон ўзининг «мудофаа салоҳияти»дан ҳеч қачон ҳужум қилишда фойдаланмаган. Эрон президенти, шунингдек, мамлакат 2015 йилда эришилган ядровий дастур бўйича келишувга амал қилишини қайд этди.
Ҳарбий парад 1980—1988 йиллардаги Эрон—Ироқ уруши хотирасига бағишланган Муқаддас мудофаа ҳафталигининг бошланиши муносабати билан ўтказилди. Хотирлаш тадбири ҳар йили Эронда ўтказилади. Ракетанинг номи Ироқ—Эрон урушининг биринчи жанглари бўлиб ўтган чегара бўйидаги Хоррамшаҳр шаҳри шарафига қўйилган.
Изоҳ (0)