Puerto-Rikoning shimoli-g‘arbida joylashgan Isabela va Kebradilyas shaharlari aholisi to‘g‘on buzilganligi sabab evakuatsiya qilinmoqda. Bu haqda San-Xuan (Puerto-Riko poytaxti) milliy meteorologik xizmati (NWS) Twitter’da ma’lum qildi, deb xabar berdi “RBK”.
“To‘g‘on ishchilari mahalliy vaqt bilan soat 21:00 da Guaxataka to‘g‘oni buzilganini va Rio-Guaxataka daryosi oqimining pastida joylashgan hududlar suv ostida qolishi mumkinligini ma’lum qildi”, — deyiladi xabarda.
“Guaxataka daryosi bo‘yidagi barcha hududlar darhol evakuatsiya qilinishi kerak. Sizning hayotingiz xavf ostida!”, — deyiladi meteoxizmat xabarida. Isabela va Kebradilyas shaharlarida 70 mingga yaqin odam istiqomat qiladi.
To‘g‘onga 21-sentabr kuni yopirilgan “Mariya” to‘foni jiddiy zarar yetkazgan. Puerto-Riko favqulodda vaziyatlar boshqarmasi vakilining so‘zlariga ko‘ra, “Mariya” mamlakatni deyarli “vayron qilgan”. Shuningdek, to‘fon bir nechta elektr uzatish tarmoqlariga ham zarar yetkazgan bo‘lib, orolning butun aholisi elektr tokisiz qolgan.
Puerto-Riko gubernatori Rikardo Rosselloning ma’lum qilishicha, elektr uzatish tarmoqlarini ta’mirlashga bir necha oy vaqt ketadi.
Izoh (0)