5 сентябрь куни Spark автомобилини олиб қочган, сўнг ушлаш пайтида қаршилик кўрсатиб, йирик ЙТҲ келтириб чиқарган шахс ушланди. Бу ҳақда Тошкент шаҳар ИИББ бошлиғи Баҳодир Қурбонов маълум қилди, деб хабар беради «Газета.uz».
Дастлабки суриштирув тадбирларининг кўрсатишича, қўлга олинган шахс илгари жиноятлар содир этган, бундан ташқари, руҳий хасталиклар шифохонаси рўйхатида ҳам турган. Жиноий иш доирасида суд-тиббиёт экспертизаси ўтказилиб, маҳбуснинг руҳий аҳволи текширилади ва шунга қараб у жиноий иш объекти бўлиши ёки бўлмаслиги мумкин.
ИИББ бошлиғининг ҳикоя қилишича, автомобилни тўхтатиб қолиш операцияси чоғида «Тутиш» режаси ишга туширилган бўлиб, унга кўра, машина ўғриси буйруққа бўйсунмаган тақдирда транспорт воситасини ўқотар қурол ёрдамида тўхтатиш кўзда тутилган.
«Ходимларимиз ўқотар қуролни ишлатди, автотранспорт воситасига зарар етказди ва уни тўхтатиб, атрофдалиглар учун таҳдиднинг бартараф этилишига эришди, — деди Баҳодир Қурбонов. — Хизмат суриштируви ўқотар қурол ходимларимиз томонидан қонуний асосда ишлатилганини тасдиқлади».
Шунингдек, у ходимлар бевосита автомобилни бошқараётган шахсга қарши ўқотар қурол ишлатиш ҳуқуқига эга бўлганини қайд қилиб ўтди. Аммо ички ишлар вазирининг буйруғига кўра қурол фақат машинага зарар етказиш учун ишлатилган.
«Ходимлар ўқотар қурол билан автотранспорт воситага қарата ўт очганига қарамай, улар оддий фуқаролар ёки ўғри зарар кўришига йўл қўймади», — деди у.
Шунингдек, Қурбонов алоҳида режа борлигини айтди:
«Бизда алоҳида режа бор. Жиноятчи қуроллангани, автомобилдалиги ва атрофдагиларга таҳдид солиши ҳақида аниқ ахборот бўлса, биз ўқотар қуролдан бундай жиноятчиларга қарши фойдаланишимиз мумкин ва фойдаланамиз ҳам».
«Агар интернетдаги видеога диққат билан қарасангиз, ички ишлар ходими ўт чизиғига тушиб қолганини, аммо чекинмаганини, иккинчиси эса қуролдан фойдаланиши мумкин бўлгани, аммо халқ ва транспорт воситалари тўпланганини ҳисобга олган ҳолда ўт очмаганини кўришингиз мумкин. Тошкент ИИББ ходимлари кўникмаларини ва ҳарбий тайёргарлигини намойиш эта олди», — деди Баҳодир Қурбонов.
«Ҳар қандай таҳдид қатъий, қоидага кўра ва қонуний асосда бартараф этилади», — қўшимча қилди ИИББ раҳбари.
У ички ишлар органлари ишининг устувор принциплари асосида Президентнинг қуйидаги талаби туришини айтиб ўтди:
«Ҳар қандай жиноят ортида жабрланувчи ва жиноятчи турибди. Уларга қарши эмас, жиноят содир этилишига олиб келган сабабга қарши курашиш лозим. Жиноятчилар ҳам, жабрланувчилар ҳам фуқаролардир. Биз ҳаммани ҳимоя қилишимиз керак».
Изоҳ (0)