Ўзбекистон Фанлар академияси Қорақалпоғистон бўлими табиий фанлар бирлашган институти Геология лабораторияси илмий ходимлари томонидан ихтиро қилинган илмий янгиликлар кенг жамоатчиликнинг эътиборини тортмоқда, деб хабар беради «KRuz.uz».
Мазкур лаборатория раҳбари, техника фанлари номзоди Иззат Айимбетов бир нечта ихтиролар муаллифи саналади.
Биноларни ер ости тузли сувлардан ишончли ҳимоялаш учун ЎзРФА Қорақалпоғистон бўлимида бир қатор синов-тажирибалар ўтказилди.
Хусусан, полиэтилен плёнка чиқиндиларини биноларнинг асосларини изоляциялашда фойдаланиш технологияси ишлаб чиқилди.
Полиэтилен чиқиндилари билан изоляциялаш биноларнинг умрини узайтиради, шу билан бирга атрофнинг ифлосланишига йўл қўйилмайди. Бундан ташқари бу технология изоляция материали бўлган қора ёғни тежайди.
Лабораторияда ишлаб чиқилган иккинчи илмий таклиф – бу кам қаватли биноларнинг тузли тупроқларда қурилишига мўлжалланган янги фундамент блогининг конструкцияси ҳисобланади. Бу илмий лойиҳада ичи кавак фундамент блогини ишлаб чиқиш таклиф этилган.
Фундаментлардаги каваклик тузга чидамли қум билан тўлдирилади. Фундамент блогини иморат майдонларини тўсиш учун мўлжалланган ғишт деворлари остига пойдевор сифатида ишлатиш мумкин. Бу фундамент блогини тайёрлашда 30—40 фоиз бетон аралашмаси тежалади.
Изоҳ (0)