Ижтимоий тармоқларда «Қашқадарё дори-дармон» акциядорларининг акциялари давлат фойдасига мусодара қилиниши, бунга корхона хусусийлаштирилаётганда тегишли ҳужжатларни расмийлаштириш чоғи қонунбузилишига йўл қўйилгани тўғрисида йўлланган шикоят сабаб эканлиги ҳақида хабар тарқалди. Бу ҳақда «Biznes-daily.uz» хабар бермоқда.
Шунингдек, айни дамда корхонанинг 200 дан зиёд ишчи-хизматчисининг ҳафсаласи пир бўлиб, қўли ишга бормаётгани таъкидланган.
Хўш, бу гап-сўзларда жон борми-йўқми?
Қашқадарё вилоятидаги собиқ «Фармация» ишлаб чиқариш бирлашмаси меҳнат жамоасининг 1994 йил 29 мартда бўлиб ўтган умумий йиғилишида мазкур корхона ва унинг базасини очиқ турдаги акциядорлик жамиятига айлантириш тўғрисида қарор қабул қилинган. Ўша йили 30 июнда шу хусусдаги буйруқ чиқарилган.
Яқинда эса Қашқадарё вилоятида яшовчи фуқародан ариза келиб тушди. Унда «Қашқадарё вилоят дори-дармон» акциядорлик жамиятини (собиқ «Фармация» бирлашмаси) давлат тасарруфидан чиқариш жараёнида, айниқса, унинг мулкларини нархлашда амалдаги қонунларга риоя қилинмагани эслатилган.
Чунончи, бирлашманинг кўп қаватли маъмурий биноси, ишлаб чиқариш базаси ва дорихоналарининг ҳақиқий ҳолати аниқланмагани, яъни улар бозор нархида баҳоланмагани таъкидланган. Шунингдек, қонунга хилоф равишда давлат тасарруфидан чиқарилган акциядорлик жамияти раҳбарияти ариза муаллифининг ҳуқуқларини поймол қилаётгани қайд этилган. Пировардида ушбу ҳолатларни холисона ўрганиб, можарони қонунан ҳал этиш сўралган.
Қашқадарё вилоят иқтисодий судининг тегишли инстанциясига рўй берган ҳолат бўйича тегишли қарор қабул қилишни сўраб даъво аризаси киритилди. Аниқланган ҳолат бўйича суд қарори чиққач, унга мувофиқ зарур чора-тадбирлар кўрилади.
Эслатиб ўтиш жоизки, давлат корхонасини давлат тасарруфидан чиқариш билан боғлиқ ҳужжатлар ҳақиқий эмас деб топилганда, унинг фаолияти тўхтатилмайди ва иш ўринлари сақлаб қолинган ҳолда, ходимлар ўз меҳнат фаолиятини давом эттиради.
Изоҳ (0)