Наманган вилоятида Ўзбекистон Республикаси Президентининг 2017 йил 16 мартдаги «Шошилинч тиббий ёрдамни янада такомиллаштириш чора-тадбирлари тўғрисида»ги фармони ва «Шошилинч тиббий ёрдам хизматининг фаолиятини ташкил этишни янда такомиллаштириш ва моддий-техника базасини мустаҳкамлаш чора-тадбирлари тўғрисида»ги қарори ижроси изчил таъминланмоқда. Бу ҳақда «Наманган ҳақиқати» газетаси хабар берди.
Шуни алоҳида таъкидлаш жоизки, аҳолига тезкор ва малакали тез тиббий ёрдам кўрсатишни таъминлаш мақсадида тез ёрдам бригадалари сони 155 тадан 178 тага кўпайтирилди. Улар малакали шифокор ва ўрта тиббиёт ходимлари билан мустаҳкамланди. Хизмат тасарруфидаги автотранспорт янгиланмоқда. 77 та янги тез тиббий ёрдам автомашинаси ҳамда 8 дона Nissan реанимобили олинди.
Шунингдек, вилоят ҳокимлигининг эътибори билан маҳаллий бюджет маблағлари ҳисобидан янги туркум санитар автомашиналари етказиб берилди. Мустақиллик айёми арафасида яна 22 та янги Damas AMB русумли автомашиналар хизмат кўрсата бошлайди.
Ҳозирда мавжуд 32 та тез ёрдам автомашиналарига GPS навигаторлари ўрнатилди. Диспетчерлик хизмати хонасида монитор ишга туширилганлиги натижасида санитар автотранспортларини бевосита назорат қилиш ва ёқилғи маҳсулотларини тежашга эришилди. 2017 йилда ҳар бир чақирув учун ажратилган маблағ миқдори 2,5 баробар кўпайтирилганлиги ҳам эътиборга моликдир.
Изоҳ (0)