АҚШга кўчиб кетиш истагидаги ўзбекистонликлар сони 2016 йилга нисбатан кўпайди
«Ижтимоий фикр» жамоатчилик фикрини ўрганиш маркази аҳолининг миграция, хусусан, меҳнат миграцияси билан боғлиқ кайфиятини ўрганиш мақсадида сўров ўтказди. Бу ҳақда UZ24 хабар бермоқда.
Сўровномада Ўзбекистоннинг барча ҳудудларидан 18 ёш ва ундан юқори жами 1100 киши иштирок этди. Сўровномада қатнашганларнинг 49,4 фоизи эркаклар, 50,6 фоизи эса аёллардир; респондентларнинг 50,5 фоизи шаҳарларда, 49,5 фоизи эса қишлоқларда истиқомат қилади.
Сўровномада қатнашганларнинг 97,1 фоизи ўз келажагини Ўзбекистон билан боғлашини, 1,5 фоизи эса доимий яшаш мақсадида хорижий мамлакатга кетиш истагини билдирган, 1,4 фоиз қатнашчилар эса жавоб беришга қийналишини маълум қилган.
Сўровнома маълумотларига кўра, 2017 йилда яшаш мақсадида АҚШга кўчиб ўтиш истагини билдирганлар сони 2016 йилга нисбатан икки баробар ортган — кўчиш истагини билдирганларнинг 14,9 фоизи АҚШни танлаган (2016 йилда АҚШни танлаганлар улуши 6,7 фоиз эди).
Америкага кўчиб ўтиш истагини билдирганларнинг аксарияти Андижон, Самарқанд, Тошкент вилоятлари ҳамда Тошкент шаҳрида истиқомат қилади.
Ғарбий Европага кетиш истагидагилар сони камайган — уларнинг улуши 2016 йилдаги 19,9 фоиздан 2017 йилда 18,8 фоизга тушган.
Сўровномада қатнашган 1100 респондентнинг бирортаси Яқин Шарққа кўчиб ўтиш ниятида эмаслиги маълум бўлди.
Сўровнома иштирокчилари орасида энг оммабоп миграция йўналиши (хусусан, меҳнат миграцияси масаласида) Россия бўлди. Респондентларнинг 43,8 фоизи Россияга кўчиш истагини билдирган (2016 йилда уларнинг сони 40 фоиз эди).
Сўровнома хулосаларига кўра, мазкур танлов «Россияда қариндошлар ва дўстларнинг борлиги» ҳамда «тил муаммосининг йўқлиги» билан асосланган.
