АҚШ президенти Дональд Трамп ўзлари орасида келишмовчилик юзага келган миллиардер Илон Маскнинг бизнесини барбод қилмаслигини маълум қилди. Бу ҳақда Америка раҳбари Truth Social ижтимоий тармоғидаги саҳифасида ёзди.
“Ҳамма мен АҚШ ҳукуматининг кўп миқдордаги субсидияларининг баъзиларини ёки барчасини олиб қўйиш орқали Илоннинг компанияларини вайрон қилишимни айтмоқда. Ундай эмас! Мен Илон ва мамлакатимиздаги барча тадбиркорлар ҳеч қачон бўлмаганидек ривожланишини хоҳлайман. Уларнинг аҳволи қанчалик яхши бўлса, АҚШнинг аҳволи шунчалик яхши бўлади”, деб ёзди Трамп.
Эслатиб ўтамиз, 29 май куни Маск АҚШ давлат самарадорлиги департаментида (DOGE) махсус давлат хизматчиси сифатидаги режалаштирилган ваколат муддати тугаётганини маълум қилган ва Трампга ҳукуматнинг “беҳуда харажатларини камайтириш имконияти” учун миннатдорчилик билдирган эди.
Июнь ойи бошида Маск ва Трамп ўртасида АҚШ президенти томонидан федерал харажатларни қисқартириш бўйича таклиф этилган кенг кўламли қонун лойиҳаси туфайли оммавий баҳс-мунозара келиб чиқди. Маск буни “жирканч разолат” деб атади. Июнь ойи охирида Маск Трамп билан келишмовчиликлар фонида АҚШда янги сиёсий партия тузишни яна бир бор таклиф қилди ва ҳозирда мамлакат “бир партияли” эканини айтди. Трамп тадбиркорнинг қонун лойиҳасини танқид қилишига жавобан субсидияларсиз “дўконини ёпиб, ЖАРдаги уйига қайтиши” кераклигидан огоҳлантирди.
Июль ойи бошида Маск ўзининг “Америка” деб номланган сиёсий партияси тузилганини эълон қилди. Америка сайлов комиссиясининг рўйхатидан маълум бўлишича, у аллақачон уни рўйхатдан ўтказиш учун ҳужжатларни расман топширган. Трамп собиқ ҳамкорининг “ақлдан озаётганини” ачиниш билан кузатаётганини айтди.
Изоҳ (0)