22 август куни Ўзбекистон Миллий кутубхонаси ва АҚШнинг Тошкентдаги элчихонаси икки томонлама ҳамкорлик тўғрисида меморандум имзолади. Меморандум имзоланиши маросимида Миллий кутубхона раҳбар ва ходимлари, кутубхоначилик соҳаси фаоллари, АҚШ элчихонаси вакиллари иштирок этди, деб хабар беради «Ўзбекистон 24».
АҚШ элчиси Памела Спратлен ҳозирги даврга қадар Миллий кутубхона билан ҳамкорликда ўтказилган тадбирлар ҳақида сўзлади ва йиғилганларни имзоланаётган меморандумдан кўзланган мақсад билан таништирди.
Меморандумни имзолаш чоғида томонлар маданият ва ахборот соҳаларида қўшма лойиҳаларни ишлаб чиқиш ва амалга оширишни, илмий, маърифий ва маданий анжуманлар, китоб кўргазмалари ҳамда тадбирларни ўтказиш, миллий мерос ва замонавий нашрлар нусхаларини алмашиш, замонавий кутубхона технологиялари, ахборот-кутубхона хизмати кўрсатишнинг энг янги шакл ва услублари, ахборот-кутубхоначилик фаолиятини ташкил қилишда ҳамкорлик ўрнатишни келишиб олди.
Шунингдек, элчихона томонидан Миллий кутубхонанинг ўқув залларидан бирини техник ускуналар, шунингдек, инглиз тилини ўрганиш бўйича дастурий таъминот ва тилга оид бир қанча таълим ресурслари (китоблар, компакт дисклар) билан таъминлаш, имконияти чекланган фойдаланувчилар учун АҚШ элчихонаси тарафидан Брайль форматидаги инглиз ва рус тилларида турли хилдаги аудио ресурслар, электрон китоб ва журналлар сотиб олиш каби вазифалар кўзланган.
Изоҳ (0)