22-avgust kuni O‘zbekiston Milliy kutubxonasi va AQShning Toshkentdagi elchixonasi ikki tomonlama hamkorlik to‘g‘risida memorandum imzoladi. Memorandum imzolanishi marosimida Milliy kutubxona rahbar va xodimlari, kutubxonachilik sohasi faollari, AQSh elchixonasi vakillari ishtirok etdi, deb xabar beradi “O‘zbekiston 24”.
AQSh elchisi Pamela Spratlen hozirgi davrga qadar Milliy kutubxona bilan hamkorlikda o‘tkazilgan tadbirlar haqida so‘zladi va yig‘ilganlarni imzolanayotgan memorandumdan ko‘zlangan maqsad bilan tanishtirdi.
Memorandumni imzolash chog‘ida tomonlar madaniyat va axborot sohalarida qo‘shma loyihalarni ishlab chiqish va amalga oshirishni, ilmiy, ma’rifiy va madaniy anjumanlar, kitob ko‘rgazmalari hamda tadbirlarni o‘tkazish, milliy meros va zamonaviy nashrlar nusxalarini almashish, zamonaviy kutubxona texnologiyalari, axborot-kutubxona xizmati ko‘rsatishning eng yangi shakl va uslublari, axborot-kutubxonachilik faoliyatini tashkil qilishda hamkorlik o‘rnatishni kelishib oldi.
Shuningdek, elchixona tomonidan Milliy kutubxonaning o‘quv zallaridan birini texnik uskunalar, shuningdek, ingliz tilini o‘rganish bo‘yicha dasturiy ta’minot va tilga oid bir qancha ta’lim resurslari (kitoblar, kompakt disklar) bilan ta’minlash, imkoniyati cheklangan foydalanuvchilar uchun AQSh elchixonasi tarafidan Brayl formatidagi ingliz va rus tillarida turli xildagi audio resurslar, elektron kitob va jurnallar sotib olish kabi vazifalar ko‘zlangan.
Izoh (0)