Каталониядаги терактга алоқадорликда гумонланиб ушланган Муҳаммад Шамлал суд чоғида ячейка Барселонадаги Саграда Фамилия (Муқаддас оила ибодатхонаси) соборида қўпорувчилик ҳаракати тайёрлаганини ҳикоя қилиб берди. Бу ҳақда, El Mundo газетасига асосланиб, «ТАСС» хабар қилмоқда.
Нашрга кўра, 21 ёшли террорчи Алканардаги уйда ушланган. У ерда 16 августдан 17 августга ўтар кечаси портлаш рўй бериб, террорчи жароҳатланган эди.
Шамлал ячейка Барселонада йирик теракт уюштиришга тайёрланганини, аммо бомба тайёрланаётганида эҳтиётсизлик туфайли портлаб кетганини билдирди.
Бундан ташқари, у Барселона ва Камбрильсдаги терактлар бир неча ой давомида тайёрланганини тан олди.
Прокурор Шамлални гаров эвазига озод қилиш ҳуқуқисиз ҳибсга олишни талаб қилмоқда. Қолган уч гумондор сўроқ қилиб бўлинганидан сўнг суд қарори маълум қилинади.
17 август куни микроавтобус Барселонанинг Рамбла кўчасида пиёдалар устига босиб келди. Кейинроқ Диагональ шоҳкўчасида номаълум шахс юк машинасида полициячиларга ҳужум уюштирди. Икки полициячи жабрланди.
Терактларнинг қурбонлари сони 15 кишини ташкил этди, 100 дан ортиқ одам жабрланди. Террорчиларнинг катта гуруҳи ушланди ёки йўқ қилинди.
Изоҳ (0)