Эрон президенти Ҳасан Руҳоний ҳукуматдаги учта расмий лавозимга аёлларни тайинлади. Бу ҳақда «РИА Новости» хабар бермоқда.
Ҳуқуқий масалалар бўйича вице-президент Мажид Ансорий ўрнини Лая Жунайдий эгаллаган. Маъсума Эбтекар янги ҳукуматда аёллар ва оила масалалари бўйича президент ўринбосари этиб тайинланган бўлса, аввалроқ худди шу лавозимда фаолият олиб борган Шаҳиндохт Мулдавердий президентнинг инсон ҳуқуқлари бўйича ёрдамчиси этиб тайинланган.
Ҳасан Руҳоний 8 август, сешанба куни янги ҳукуматдаги лавозимларга номзодлар рўйхатини тасдиқлаш учун парламентга тақдим этган эди. Депутатлар номзодлар таржимаи ҳоли ва уларнинг янги лавозимдаги иш режалари билан танишишга киришган. Президент томонидан тақдим этилган вазирлик лавозимларига номзодлар рўйхатида аёллар йўқ.
Марзиё Воҳид Дастжердий Эрон Ислом Республикаси ташкил этилганидан буён мамлакатда вазирлик лавозимида ишлаган ягона аёлдир. У собиқ президент Маҳмуд Аҳмадинажод ҳузуридаги ҳукуматда соғлиқни сақлаш ва тиббий таълим вазири сифатида меҳнат қилган.
Изоҳ (0)