Япония АҚШ билан ҳамкорликда КХДРнинг баллистик ракеталарга ядровий каллак ўрнатиш имкониятларини таҳлил қилиб чиқади. The Washington Post томонидан берилган хабарларга кўра, Шимолий Корея баллистик ракеталарга ўрнатиш учун ядровий каллак ишлаб чиққан. Бу ҳақда Япония мудофаа вазири Ицунори Онодеранинг баёнотига таяниб, «ТАСС» хабар берди.
«Бу таҳдиднинг янги босқичи эканлигига шубҳа йўқ. Бир қатор ҳисоботларга кўра, Шимолий Кореянинг ракеталари АҚШнинг материк қисмига етиб бора олади, унинг ядро қуролини кичрайтириш технологиялари эса ривожланмоқда. Биз АҚШ билан ҳамкорликда Шимолий Кореянинг қуроллар ишлаб чиқиш бўйича ҳозирги ишланмалари даражасини қўшимча таҳлил қилишимиз зарур», — деди япон мудофаа вазири.
Аввалроқ The Washington Post Америка махсус хизматларининг ҳисоботига таяниб, КХДР баллистик, шу жумладан, қитъалараро ракеталарга ўрнатилиши мумкин бўлган ядровий каллак ишлаб чиққани ҳақида хабар берган.
Изоҳ (0)