Eron prezidenti Hasan Ruhoniy hukumatdagi uchta rasmiy lavozimga ayollarni tayinladi. Bu haqda “RIA Novosti” xabar bermoqda.
Huquqiy masalalar bo‘yicha vitse-prezident Majid Ansoriy o‘rnini Laya Junaydiy egallagan. Ma’suma Ebtekar yangi hukumatda ayollar va oila masalalari bo‘yicha prezident o‘rinbosari etib tayinlangan bo‘lsa, avvalroq xuddi shu lavozimda faoliyat olib borgan Shahindoxt Muldaverdiy prezidentning inson huquqlari bo‘yicha yordamchisi etib tayinlangan.
Hasan Ruhoniy 8-avgust, seshanba kuni yangi hukumatdagi lavozimlarga nomzodlar ro‘yxatini tasdiqlash uchun parlamentga taqdim etgan edi. Deputatlar nomzodlar tarjimai holi va ularning yangi lavozimdagi ish rejalari bilan tanishishga kirishgan. Prezident tomonidan taqdim etilgan vazirlik lavozimlariga nomzodlar ro‘yxatida ayollar yo‘q.
Marziyo Vohid Dastjerdiy Eron Islom Respublikasi tashkil etilganidan buyon mamlakatda vazirlik lavozimida ishlagan yagona ayoldir. U sobiq prezident Mahmud Ahmadinajod huzuridagi hukumatda sog‘liqni saqlash va tibbiy ta’lim vaziri sifatida mehnat qilgan.
Izoh (0)