Хитойлик бизнесмен бир неча кун ичида 9 млрд долларга бойиб кетди

Хитойнинг энг йирик қурувчи компанияси — Evergrande Group’нинг акциялари икки кун ичида 34 фоиздан кўпроқ қимматлашди, деб ёзади Forbes.

Бунинг шарофати билан компания хўжайини Хуэй Каньваннинг давлати 27 июль ҳолатига 8 миллиард долларга кўпайиб, 29,9 миллиардни ташкил этди. Котировкалар ўсишда давом этмоқда ва унинг бойлиги 31 июль ҳолатига 30,9 миллиард долларга баҳоланмоқда. Бу шуни билдирадики, 25 июлдан бери у 9 миллиард долларга ошган.

Шу тариқа, у ҳозирда Хитойдаги учинчи энг бой одамга айланди — биринчи ва иккинчи ўринларни Alibaba асосчиси Жек Ма (36,2 миллиард доллар) ва Tencent телекоммуникация компанияси асосчиси Ма Хуатэн (35,4 миллиард доллар) эгаллаган.

Evergrande Group 2017 йилнинг биринчи ярмида унинг аудит қилинмаган соф фойдаси ўтган йилгидан уч карра кўпроқ бўлишини эълон қилгач, девелопернинг миллиардерга тегишли акциялари нархи кескин кўтарилиб кетди.