Ўзбекистон Республикаси ҳудудига жисмоний шахслар томонидан товарларни аксиз солиғи солинмасдан олиб киришнинг рухсат этилган меъёрларига мувофиқ умумий оғирлиги 30 граммдан ортиқ бўлмаган қимматбаҳо тошлар ва қимматбаҳо металлдан тайёрланган 5 донагача заргарлик буюмларини олиб киришга рухсат этилади, деб хабар берди «Тошкент-Аэро» ИБК ахборот хизмати.
Шунга қарамай Ислом Каримов номидаги Тошкент халқаро аэропортида Истанбулдан учиб келган фуқаро Х. Бурхонова мазкур тартибларни бузишга уринди. У йўловчи божхона декларациясида ва божхона ходимларининг оғзаки сўрови пайтида маълум қилмасдан туриб, қиймати дастлабки ҳисоб-китобларга кўра салкам 73 миллион сўмни ташкил қилувчи 364 грамм оғирликдаги тилла тақинчоқларни багажига яширган ҳолда олиб киришга уринган пайтда тўхтатиб қолинди.
«Истанбул—Тошкент» рейсининг яна бир йўловчиси Н. Халимова ҳам холислар иштирокида шахсий кўрикдан ўтказилганда, йўловчи божхона декларациясида ва божхона ходимларининг оғзаки сўрови пайтида маълум қилинмаган қиймати 10 миллион сўмдан ортиқ 104 грамм оғирликдаги тилладан ишланган заргарлик буюмларини чўнтагига яширганча олиб кирмоқчи бўлганлиги фош бўлди.
Маълумки, республикадан тилла ва заргарлик буюмларини экспорт қилиш фақатгина Вазирлар Маҳкамаси кўсатмасига асосан Ташқи савдо вазирлиги томонидан бериладиган лицензия асосида амалга оширилади.
Фуқаролар Ш. Ортиқов ҳамда Й. Абдураҳмоновалар мазкур тартибларга риоя қилмасдан йирик миқдордаги тилла қуймаларни Ўзбекистон орқали ноқонуний олиб чиқишга уринган.
«Тошкент—Деҳли» рейси бўйича парвоз олдидан ушбу шахсларнинг безовталаниши божхоначиларда бежизга шубҳа уйғотмаган. Одатдагидек, уларга тегишли багажлар назорат-рентген аппаратидан ўтказилганда, монитордаги тасвирларнинг шубҳали тус олиши божхоначиларни жомадонларни синчиклаб текширишга ундади.
Ш. Ортиқовга тегишли багажда 485 грамм оғирликдаги 14 та ҳамда Й. Абдураҳмонованинг багажида 607 грамм оғирликдаги 16 та қуйма тиллаларнинг яширин равишда олиб чиқилиши олди олинди. Дастлабки ҳисоб-китобларга кўра, ушбу тиллаларнинг тахминий нархи салкам 100 миллион сўмни ташкил қилади.
Деҳлига отланган фуқаролар О. Мирзаева ва Г. Мирзаева ҳам ички кийимлари орасига бекитганча тилла қуймаларни яширин равишда олиб чиқаётган пайтда тўхтатиб қолинди. Шахсий кўрик давомида маълум бўлишича, Г. Мирзаева қиймати салкам 18 миллион сўмлик 197 грамм оғирликдаги ва унинг ҳамроҳи О. Мирзаева салкам 14 миллион сўмлик 152 грамм оғирликдаги тиллани қуйма бўлаклар шаклида олиб чиқиб кетишга уринган.
Ҳозирда мазкур ҳолатлар юзасидан божхона текширувлари ва суриштирув ҳаракатлари давом эттирилмоқда.
Таъкидлаш жоизки, «Тошкент-Аэро» ихтисослаштирилган божхона комплекси ходимлари томонидан ҳуқуқни муҳофаза қилувчи бошқа идоралар вакиллари билан ҳамкорликда 2017 йилнинг биринчи ярми давомида аниқланган 53 та божхона қоидабузарликлари натижасида қиймати салкам 658 миллион сўмлик 10,6 килограммдан ортиқ оғирликдаги тилла ва заргарлик буюмларининг ноқонуний олиб ўтилишига чек қўйилган.
Изоҳ (0)