Бухоро ва Навоий вилоятларининг чекка ҳудудларида истиқомат қилувчи аҳолини юқори малакали тор соҳа мутахассислари иштирокида чуқурлаштирилган тиббий кўриклардан ўтказиш мақсадида «Саломатлик« поездлари Тошкент шаҳридан жўнаб кетди. Бу ҳақда «Дарё»га Соғлиқни сақлаш вазирлиги ахборот хизмати хабар берди.
Ҳар икки ҳудудда ҳам 25 июль, сешанба куни ихтисослаштирилган марказлар директорлари бошчилигида 10 га яқин тор мутахассисдан иборат гуруҳлар ўз ишини бошлади. Уларнинг таркиби республика ихтисослаштирилган тиббиёт марказлари, илмий-текшириш институтлари, республика клиник шифохоналарининг етакчи олимлари, тиббиёт фанлари докторлари ва юқори малакали шифокорларидан ташкил топган.
Тиббий кўрикларда ҳар бир беморга алоҳида эътибор қаратилмоқда. Хусусан, тўшакда ётиб қолган қариялар ва беморлар ҳолидан зарур тиббий асбоб-ускуналар билан уйига бориб хабар олинмоқда.
Кўриклар натижасида аниқланган беморларнинг амбулатор шароитда вилоят ва республика тасарруфидаги даволаш-профилактика муассасалари, республика ихтисослаштирилган марказларида соғломлаштирилиши кўзда тутилган.
Республика ихтисослаштирилган тиббиёт марказларидан борган малакали мутахассислар маҳаллий шифокорларга мураккаб жарроҳлик амалиётлари ва даволаш усуллари бўйича маҳорат дарслари ҳам ўтмоқда.
Изоҳ (0)