Ирландия ҳукумати Apple’дан олинган 15 млрд долларни тасарруф қиладиган фонд ташкил этади

Ирландия расмийлари Apple корпорациясидан олинган 13 миллиард евро (15,2 миллиард доллар) қўшимча солиқлардан иборат маблағни бошқарадиган махсус фонд ташкил этади. Бу ҳақда Bloomberg маълум қилди, дея хабар беради «Корреспондент.net». 

Пуллар Apple ва Ирландия ҳукумати Еврокомиссия қарори юзасидан баҳслашгунча фондда қолиши, ишнинг кўриб чиқилиши эса бир неча йилга чўзилиши мумкинлиги билдирилмоқда. Ўтган йил августида Еврокомиссия мамлакатда корпорация учун солиқ имтиёзлари нотўғри қўлланган деб ҳисоблаб, Apple Ирландияда қўшимча солиқ тўлаши ҳақида қарор қабул қилганди. 

Фондни ташкил этишда Apple вакиллари корпорациядан қўшимча солиқ ундирилишига қарши чиқаётган ва солиқ имтиёзлари ноқонуний қўлланганмаганини даъво қилаётган Ирландия ҳукумати қаторида иштирок этади. Жамғарма инвестицияларни бошқариш учун бир ёки бир неча менежерларни ёллаши кутилмоқда.