«Мегафон» операторни алмаштириш ниятида бўлган мижозига 2999 йилга қадар 25 фоизли чегирма тақдим этди

Россиянинг «Мегафон» компанияси ўз абонентига алоқа хизматлари учун 2999 йил 31 декабрга қадар 25 фоиз чегирма берди. Бу ҳақда Магаданда яшовчи ва фамилиясини ошкор этишни истамаган Дмитрий Twitter’даги саҳифасида маълум қилди, дея хабар беради «Ведомости». 

Мухолифатчи Алексей Навальнийнинг Халқ штаби ходими бўлган Дмитрий «Мегафон» абонент хизматига 15 июнда компания жамоатчилик билан алоқалар директори Пётр Лидов твити туфайли мурожаат этди. Лидов унда Россияда 12 июнда ўтказилган коррупцияга қарши оммавий намойишлар иштирокчиларини «она сути оғзидан кетмаган дегенератлар» ( акция қатнашчилари ва қўлга олинганлар орасида вояга етмаганлар ҳам кўп эди) деб атаганди. Эртасига у муштарийлар олдида узр сўради. 

Дмитрий оператор абонент хизматига мурожаатига мазкур твитга ҳаволани илова қилди, унинг таҳқирловчи мазмундалиги, шу сабабли операторни алмаштириш ниятида эканлигини билдирди. «Мегафон» вакиллари орадан бир ой ўтиб — 17 июлда мижозга жавоб қайтарди ва ходимининг (Лидов яқин орада истеъфо бериши маълум қилинди) қилмиши учун узр сўради. 

«Ҳурматли мижоз! Сизга 2999 йил 31 декабрга қадар 25 фоизли чегирма тақдим этилди», — дейилади абонент хизмати хабарида. 

Дмитрий ҳозирча операторни алмаштириш ниятида эмас.