12 июнь куни Петербургда норозилик намойишини ўтказгани учун қўлган олинган шахсларнинг маълум қилишича, улар тунни ўтказган 33-полиция бўлимидаги камерага газ қўйиб юборилган. Бу ҳақда «ОВД-Инфо»га таяниб, Meduza хабар берди.
Таҳририятга Навальнийнинг Петербургдаги штаби вакиллари томонидан газ ҳақида сўзлаган икки гувоҳнинг аудиоёзуви топширилган. Яна икки нафар гувоҳ газ ҳақида бевосита «ОВД-Инфо» нашрига сўзлаб берди.
Гувоҳларнинг сўзларига кўра, полициячилар бўлимда 12 июндаги намойишга алоқаси йўқ шахс камерасига газ қўйиб юборган. «Буни бажарган полициячилар ўзларининг бўлимида вентиляция қай ҳолда ишлаши ҳақида ўйлашмагани аниқ: газ бошқа камераларга ҳам тарқаб кетди», — деди гувоҳлардан бири.
Бошқа бир гувоҳнинг айтишича, у тунни ўтказган камерада астмага чалинган одам бўлган ва газ сабабли унинг аҳволи оғирлашган. Олег Кабатов исмли гувоҳ эса «Барчамиз буғила бошладик. Қанчадир лаҳза давомида мен шунчаки нафас ололмаётганимни тушундим»,— деди «ОВД-Инфо»га.
Камерага телефон олиб киришга муваффақ бўлган шахслардан бири тез ёрдамни полиция бўлимига чақирган. Шифокорлар «бу ерни нима қилиб ташладинглар, нафас олиб бўлмаяпти-ю, бу ерга ўнта тез ёрдам олиб келиш керак», дея пулсини текшириб қайтиб кетворган.
Кейинроқ полиция қўлга олинганларни камерадан ертўладаги актлар залига олиб тушган.
Гувоҳлардан бирининг таҳминича, полиция бўлимида қалампирли газ қўлланилган.
Изоҳ (0)