ИШИД террорчилик гуруҳи бошлиқларининг кўпчилиги халқаро коалиция кучлари шиддатли ҳужум уюштираётган Суриянинг Раққа ва Ироқнинг Мосул шаҳарларидан Суриянинг Ал-Маядин шаҳрига қочиб кетди. Бу ҳақда AP АҚШ ва Суриядаги манбаларига таяниб хабар берди, деб ёзади «РИА Новости».
Агентлик маълумотларига кўра, террорчилар бошлиқлари Дайр-аз-Зор провинциясидаги Ал-Маядин шаҳрига ўрнашиб олган. Шаҳар Ироқ билан чегара яқинидаги Фрот дарёси соҳиллари ёнида жойлашган водий марказидадир.
ИШИДнинг Ироқдаги энг йирик таянчи — Мосулни озод этиш бўйича операция 2016 йил октябридан буён АҚШ раҳбарлигидаги коалиция кўмагида давом этмоқда. Ироқлик ҳарбийлар дастлаб шаҳарнинг шарқий қисмини озод этди, февралда эса унинг ғарбий қисмига ўтди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)