Бухоро вилояти божхона бошқармаси жорий йил давомида 466 та божхона қоидабузарликларини аниқлади
Бухоро вилояти божхона бошқармаси ходимлари товар-моддий бойликларини Ўзбекистон ҳудудига ноқонуний равишда импорт қилишга уринган бир нечата ҳолатларни аниқлади, деб хабар берди Ўзбекистон Республикаси Давлат божхона қўмитасининг матбуот хизмати.
Жумладан, Бухоро вилоятдаги «Олот» чегара божхона комплекси ходимлари хорижий фуқаро К. Тахсин бошқарувида Туркиядан Ўзбекистонга кириб келган юк автотранспорт воситасини ўрнатилган тартибда мобил инспексион-текширув аппарати кўмагида божхона назоратидан ўтказилганида навбатдаги божхона қоидабузарлиги аниқланган.
Йўл-юк кузатув ҳужжатларига кўра, Тошкент шаҳридаги Adamant Mega Trade фирмаси номига келтирилаётган ушбу контейнерда аслида қиймати салкам 6,5 минг АҚШ долларини ташкил қилувчи 16 тоннадан ортиқ оғирликдаги тўқимачилик маҳсулотлари ва болалар кийим-кечаклари бўлиши лозим бўлган, аммо божхона кўриги давомида контейнердаги товарлар билан йўл-юк кузатув ҳужжатларидаги маълумотлар ўртасида кескин тафовут мавжудилиги, мазкур товарлар ҳужжатлардагидан кўра ҳаддан ташқари ортиқча миқдорда эканлиги маълум бўлган.
Ҳисоб-китобларга кўра йўл-юк кузатув ҳужжатларидан қайд этилмаган товарларнинг умумий миқдори 868,465 миллион сўмни ташкил қилди. Шу тариқа, қонунбузарлар давлат бюджетига ундирилиши лозим бўлган 105 миллион сўмдан ортиқ божхона тўловларидан қочишга уринишган.
Бухоро вилояти божхона бошқармасининг «Хўжадавлат» темир йўл чегара божхона постида ҳам шу турдаги яна бир божхона қоидабузарлиги фош қилинди.
Мазкур постда Ўзбекистон ҳудудига кириб келган юк поезди белгиланган тартибда божхона кўригидан ўтказилганда, вагонлардан бирига ортилган минерал сувлар божхоначиларнинг диққатини тортди.
Грузиядан Тошкентдаги Best Energy Business МЧЖ номиган юборилган мазкур юкларга тегишли ҳужжатларга кўра, ушбу вагондаги 63 тоннадан ортиқ минерал сувлар ярим литрлик идишларга қадоқланган бўлиши лозим эди. Аммо, контейнердаги қиймати салкам 741 миллион сўмлик ичимликлар эса бутунлай бошқа сиғимдаги идишларга қадоқланган экан.
Шу тариқа қонунбузарлар бу усуллари билан давлат бюджетига ундирилиши лозим бўлган 63 миллион сўмдан ортиқ божхона тўловларидан бўйин товлаган.
