Тошкентдаги Жаҳон иқтисодиёти ва дипломатия университети (ЖИДУ)да 27 май куни Ўзбекистон Ташқи ишлар вазирлиги билан ҳамкорликда илк бор «ШҲТ Модельи» Талабалар анжумани ўтказилди. Бу ҳақда университет вакиллари «Дарё»га маълум қилди.
Россия, Қозоғистон, Хитой, Тожикистон каби ШҲТга аъзо давлатларнинг Ўзбекистондаги элчилари иштирокидаги ўзига хос симулятор конференцияни модель клуби бош котиби, ЖИДУ талабаси Давлат Умаров очиб берди.
Шундан сўнг сўзга чиққан университет ректори Абдумалик Жуманов ҳамда элчилар табрик нутқларида бундай тадбирлар ва клубларнинг фаолияти соҳадаги ёш мутахассисларни ҳар томонлама тоблаб бориши ҳамда келажакдаги йирик лойиҳалар учун ўта аҳамиятли эканлигига эътибор қаратди.
Тошкентдаги олий таълим муассасаларининг 50 дан зиёд илғор ёшлари «ШҲТ Давлат раҳбарлари кенгашининг 18 делегацияси» сифатида ялпи муҳокамалар, давра суҳбати, илмий мақолалар танловида қатнашиш имкониятига эга бўлди.
Университетдаги «ШҲТ модели» клуби асосчиси Давлат Умаров ШҲТнинг 15 йиллик юбилейини нишонлаш доирасида ўтказилган «Шанхай ҳамкорлик ташкилотига 15 йил: Ибтидо. Тараққиёт. Истиқболлар» мавзусида энг яхши илмий мақола танловининг 2016 йилдаги ғолиби саналади.
Изоҳ (0)