Тўйларда қатнашаётган ҳайдовчилар улар ҳам йўл-ҳаракати иштирокчилари эканлигини кўпинча унутиб қўяди. Ғарбий Қозоғистон вилояти Ички ишлар департаменти Маҳаллий полиция хизмати тўй кортежлари иштирокчилари йўл ҳаракати қоидалари нуқтайи назаридан ҳеч қандай имтиёзга эга эмаслигини эслатиб ўтади. Полиция энг кўп тарқалган қоидабузарликлар ва жарималар ҳақида ҳикоя қилади. Бу ҳақда «Zakon.kz» хабар бермоқда, деб ёзади «1news.uz».
Тантанани нишонлаш учун сигнал чалиш
Йўл ҳаракати қоидалари 19-бўлими 12-бандида товуш сигналларини қўллаш мумкин бўлган вазиятлар акс эттирилган. Унда тўй ҳақида сўз юритилмаган. Қолаверса, товуш сигналлари бошқа ҳайдовчилар эътиборини тўй кортежига қаратиб, бошқарувдан чалғитади. Бу эса ЙТҲларини келтириб чиқариши мумкин.
ЙҲҚга кўра, бирор сабабсиз товуш сигнали бериш ойлик ҳисоб кўрсаткичининг беш баробари миқдоридаги маъмурий жазога сабаб бўлади. Жорий йилнинг тўрт ойи давомида 37 нафар ҳайдовчи ана шундай маъмурий жавобгарликка тортилган.
Кортежни узиб қўймаслик
Ҳайдовчилар ушбу анъанага риоя қилиш учун кўп ҳолатларда светофорнинг қизил чироғида ҳам ҳаракатланиб, қўпол қоидабузарликка йўл қўяди. Бундай ҳаракатлар нафақат қоидабузарларнинг ўзи, балки йўл ҳаракатининг бошқа иштирокчилари учун ҳам хавф туғдириши мумкин.
Қизил чироқда ҳаракатланиш ойлик ҳисоб кўрсаткичининг ўн баробари миқдоридаги жаримага сабаб бўлади (ўтган давр мобайнида етти нафар ҳайдовчи жавобгарликка тортилган). Авария вазиятини келтириб чиқариш ҳам шу миқдордаги жаримага сабаб бўлади (ўтган давр ичида уч нафар ҳайдовчи жазоланган).
Машина деразасидан бош чиқариб, видеога олиш
Техник хавфсизлик туфайли рухсат берилмайди. Деразадан бош чиқариб кетаётган одам билан ҳар қандай ҳодиса юз бериши мумкин. Бу нафақат видеооператорлар, балки тўй кортежининг бошқа иштирокчиларига ҳам тааллуқли.
Деразадан бош чиқариб кетаётган одамлар билан ҳаракатланиш йўловчи ташиш қоидаларини қўпол бузиш ҳисобланади. Мазкур ҳолатларда ойлик ҳисоб кўрсаткичининг беш баробари миқдоридаги жарима қўлланилади (ўтган давр ичида 42 нафар ҳайдовчи маъмурий жавобгарликка тортилган).
Тўй рақамларини илиш
Одатий рўйхатдан ўтган белгилар устидан ёпиштирилган «Куёв» ёки «Келин» сўзлари ҳам қонунчиликка кўра, рақамларни қасддан яшириш тоифасига киради. Бундай рақамлар тезлик мобил датчиклари томонидан қайд этилмайди ва тўй кортежи ҳайдовчилари бундан фойдаланиши мумкин. Бундай сўзларни машинанинг фақат олд томонига ёпиштириб, орқа томонида оригинал рақамларни қолдириш ҳам қонунга хилоф ҳисобланади.
Бундай тўй белгиларини ёпиштириш учун ойлик ҳисоб кўрсаткичининг ўн баробари миқдоридаги жарима кўзда тутилган (беш нафар ҳайдовчи жазога тортилган).
Одатдан ташқари ҳаракатланиш
Тўй кортежларининг қарама-қарши йўналишда ҳаракатланиш ҳолатлари учраб туради. Бундай ҳаракатланиш рўпарадан тўқнашиш ва бошқа қайғули ҳолатларни келтириб чиқариши мумкин.
Бундай қоидабузарлик учун бир йил муддатга ҳайдовчилик гувоҳномасидан маҳрум этиш белгиланган (ўтган давр мобайнида беш нафар ҳайдовчи жазоланган).
Маст ҳолатда автомобиль бошқариш
Бунинг учун энг оғир маъмурий жазо — уч йилга транспорт воситасини бошқариш ҳуқуқидан маҳрум этиш жазоси қўлланилади (ўтган давр мобайнида битта ҳолат аниқланган).
Изоҳ (0)