Келгуси ўн йиллик охирига бориб янги автомобиллар сотувининг салкам учдан бири электромобиллар ҳиссасига тўғри келади. Bataреяларда ишловчи транспорт воситалари сонининг кўпайиши 2030 йилда нефть асосидаги ёқилғига талаб пасайишини келтириб чиқаради. Бу ҳақда Total компаниясининг энергетика бўйича бош иқтисодчиси Жоэл Куз Bloomberg New Energy Finance (BNEF) анжуманида маълум қилди, дея хабар беради Insider.
«2030 йилга келиб дунёдаги барча янги машиналарнинг 15 дан 30 фоизигача электрда ишлайди. Шундан сўнг ёқилғига талаб ошишдан тўхтайди, ҳатто тушиб кетиши ҳам мумкин», — дея таъкидлади Жоэл Куз.
Бошқа нефть компаниялари ҳам ёқилғига бўлган узоқ муддатли талаб башоратларини пасайтирмоқда. Royal Dutch Shell бош ижрочи директори Бен ван Берден 2020 йиллар охирига келиб нефтга талаб авжига чиқишини тахмин қилди. Шу сабабли компанияда «соф технологиялар»ни қидириш бўйича бизнес-бўлинма ташкил этилди.
Ҳозирда дунёдаги енгил автомобиллар сотувининг атиги 1 фоизи электромобилларга тўғри келяпти, бироқ автоконцернлар бозордаги ўзгаришларга тайёргарлик кўрмоқда. 2020 йилга келиб ўнлаб янги моделлар, жумладан, Volkswagen, Jaguar, Volvo, Mercedes-Benz, General Motors электромобиллари пайдо бўлади.
Электромобиллар бензинда юрадиган моделлар билан ҳам нарх-наво, ҳам ишлаб чиқариш хусусиятларига кўра рақобатга киришиши кутилмоқда.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)