Душанбедаги етим болалар учун 1-сонли мактаб-интернат ишчилари Тожикистоннинг Asia-Plus нашрига ўзбекистонлик бизнесменлар тарбияланувчиларни Ўзбекистондан келтирилган ширинликлар билан хурсанд қилганини айтиб берди.
Нашр тафсилотларни билиш учун Ўзбекистоннинг Душанбедаги элчихонасига мурожаат қилди. Элчихона атташеси Фарҳод Раҳмонбердиев маълум қилишича, гуманитар акцияни Душанбедаги кўргазмада иштирок этаётган Тошкентнинг Sladuce Produce кондитер компанияси ходимлари Қаҳрамон Маннопов ва Камолиддин Зокиров ўз ташаббуси билан ўтказган.
«Бугун (19 апрель) компания вакиллари Душанбедаги 1-сонли мактаб-интернатга йигирма килограмм турли ширинликларни топширди. Эртага улар худди шу миқдордаги кондитер маҳсулотларини Тожикистоннинг қийин ҳаётий вазиятга дуч келган фуқароларига ижтимоий хизмат кўрсатувчи «Карвони Умид» ташкилотига топширишни режалаштирмоқда», — деди Раҳмонбердиев.
Нашр эслатишича, шу кунларда Душанбеда ўзбек маҳсулотлари кўргазмаси бўлиб ўтмоқда.
Изоҳ (0)