Росгвардиянинг Чеченистоннинг Наур қишлоғидаги бўлинмаси жангчилари жангарилар ҳужум қилган вақтда қуролсиз бўлган, навбатчилар эса ухлаб қолган. Бу ҳақда «РБК» республика куч тузилмаларига яқин манбаларига таяниб маълум қилди, деб ёзади Meduza.
Жангарилар ҳарбий қисм тўсиқларидан ўтиб, назорат-ўтказиш пунктига етиб борган ва очиқ эшикдан кириб, бу вақтда ухлаб ётган икки навбатчини ўлдирган ва уларнинг автоматларини олиб қўйган.
Росгвардиянинг ҳужум кечаси навбатчиликда бўлмаган жангчилари қуролсиз бўлган. Қоидага кўра, 18:00 га қадар барча қурол-яроғлар омборхонага топширилиши керак, унинг калити эса навбатчида сақланади. Қуролни бўлинма командири навбатчининг тревога сигналидан сўнг тарқатиши мумкин. Аммо ўша тунда навбатчилардан ҳеч қандай тревога сигнали келиб тушмаган.
Шунингдек, нашр манбалари айтишича, мавжуд маълумотларга кўра, Росгвардия бўлинмасига олти эмас, саккиз жангари ҳужум қилган, уларнинг икки нафари қочиб қолган. Ҳужум қилганларнинг камида олти нафари профилактик ёки ваҳобийлик деб аталувчи рўйхатда турган, баъзилари, шунингдек, ҳарбий қисм ҳудудида таъмир ишлари баҳонасида аввал ҳам бўлган.
Нашр суҳбатдошларидан бири Росгвардия бўлинмасига ҳужумнинг асосий мақсади жангариларнинг қурол-яроғни қўлга киритиш истаги бўлганлигини тахмин қилди.
24 мартга ўтар кечаси жангарилар Росгвардия ҳарбий қисмига ҳужум уюштирди. Олти жангарининг барчаси йўқ қилинди, аммо операция чоғида олти ҳарбий хизматчи ҳалок бўлди, яна уч нафари яраланди.
Изоҳ (0)