Шотландия парламенти 28 март куни бўлган йиғилишда ҳудуднинг Буюк Британиядан мустақиллиги масаласида янги референдум ўтказиш масаласини маъқуллади. Meduza’нинг ёзишича, биринчи вазир Никола Старженнинг таклифини 69 депутат қўллаб-қувватлаган, 59 депутат қарши овоз берган.
Буюк Британиянинг Шотландия ишлари бўйича вазири Дэвид Манделлнинг маълум қилишича, расмий Лондон Brexit жараёни якунига етмагунича, The Guardian’нинг ёзишича, 2020 йилга қадар Шотландия билан янги референдум масаласида музокаралар ўтказмайди.
Старжен эса мустақиллик масаласидаги референдумни 2018 йил кузидан 2019 йил баҳоригача бўлган оралиқда ўтказишни режаларини эълон қилиб улгурди.
Буюк Британиянинг Европа Иттифоқи таркибидан чиқиши масаласида 2016 йили ўтказилган референдумда Шотландиянинг аксарият аҳолиси қарши овоз берган, бироқ «Брекзит» тарафдорлари кичик устунлик билан ғалаба қозонган эди.
Буюк Британия қироличаси 2017 йил мартида «Брекзит» жараёнини бошлаш ҳақидаги қонунни имзолаганидан сўнг, Шотландия биринчи вазири Никола Старжен мустақиллик масаласида янги референдумга тайёргарликни эълон қилди. Буюк Британия ҳукумати бу режага қарши чиқди.
Шотландиянинг Буюк Британиядан мустақиллиги масаласидаги биринчи референдум 2014 йили ўтказилган эди. Ўшанда ҳудуд аҳолисининг 55,3 фоизи қироллик таркибида қолиш учун овоз берган эди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)