Фарғона вилояти Қўштепа тумани ИИБ ҳуқуқбузарликларни олдини олиш бўлинмасининг тезкор ҳаракатлари туфайли ўз жонига қасд қилиб, вояга етмаган фарзанди билан ўзини каналга ташлаб юборган аёл қутқариб қолинди. Бу ҳақда Ўзбекистон ИИВ матбуот хизмати хабар бермоқда.
Хабар беришларича, 2017 йил 3 март куни соат 10:50 ларда, Қўштепа тумани ИИБ ҳуқуқбузарликларни олдини олиш бўлинмаси бошлиғи майор Давлат Даминовга туман ҳокимининг ўринбосари, хотин-қизлар кенгаши раиси Муҳаббат Мўйдинова қўнғироқ қилиб, Дўрмон қишлоқ фуқаролар йиғини ҳудудидан оқиб ўтган катта Фарғона каналининг ўнг томонида аёл киши қўлида вояга етмаган фарзанди билан ўйчан аҳволда ўтирганлигини, ҳозирда унинг олдига бораётганлиги ҳақида хабар берган.
Мазкур хабардан сўнг, майор Даминов зудлик билан Мўйдинова айтган жойга етиб борганида, канал қирғоғида ўтирган аёл ўз жонига қасд қилиб, қўлидаги вояга этмаган фарзанди билан бирга ўзини каналга ташлаб юборган.
Шу вақтда йўловчилар — Қўштепа тумани Лангар қишлоқ фуқаролар йиғинида яшовчи Абдуҳамид Ғуломов ва Азизжон Бўтаев уларни қутқариш учун ўзини сувга ташлаган.
Уларни ортидан майор Даминов ҳам ўзини сувга ташлаб, чўкиб кетаётган аёлни ва унинг вояга етмаган фарзандини қутқаришга ҳаракат қилган — болани қутқариб олиб, сувдан чиқарган. Сўнг эса ортига қайтиб, юқоридаги фуқаролар ёрдамида аёлни ҳам қутқариб, қирғоққа олиб чиққан.
«Ҳозирда 1994 йилда туғилган аёл ва унинг икки яшар фарзандининг аҳволи қониқарли ҳолатда. Мазкур ҳолат юзасидан туман прокуратураси томонидан терговолди суриштирув ҳаракатлари олиб борилмоқда», — дейилади вазирлик ахборотида.
Аёл нима учун ўзини сувга ташлагани бўйича дастлабки маълумотлар билдирилмаган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)