Франция президентлигига номзод Франсуа Фийон суддан чақирув қоғози олди. У сайловдан чиқишдан бош тортди

«Республикачилар» партиясидан Франция президентлигига номзод Франсуа Фийон у ва унинг хотини Пенелопга нисбатан олиб борилаётган тергов ҳаракатларига қарамай, сайловдан чиқмайди. Бу ҳақда Meduza хабар бермоқда.

Аввалроқ Фийон ва унинг хотинига суднинг чақирув қоғозлари тақдим этилгани, улар март ойи ўрталарида суд мажлисида қатнашишлари лозимлиги маълум бўлган эди. Фийон бу терговни «сиёсий қотиллик» деб атади.

У терговчиларга барча ҳақиқатни маълум қилишга ваъда бериб, суриштирув ишлари унинг айбсиз эканини тасдиқлашига умид билдирди.

Пенелоп Фийонга нисбатан тергов ҳаракатлари у Франсуа Фийон парламент депутати ва сенатори бўлган вақтларда унинг ёрдамчиси сифатида ишлагани сабаб олиб борилмоқда. ОАВнинг аниқлашича, Фийоннинг хотини аслида ҳеч қандай иш қилмаган бўлса-да, мунтазам маош олиб турган.

Фийон — сайловолди пойгасининг фаворитларидан бири. Сўровномаларга кўра, сайловнинг биринчи турида катта эҳтимол билан «Миллий фронт» етакчиси Марин Ле Пен ғалаба қозонади. Иккинчи турда эса ғалаба Ле Пеннинг икки асосий рақибидан бири — Фийон ёки Эммануэль Макронга насиб этиши тахмин қилинмоқда.

«Дарё»нинг Telegram’даги расмий канали — @toshqindaryo’га аъзо бўлинг!