Тошкентнинг «Пахтакор» футбол клуби 2017 йилги мавсумнинг уй учрашувларини томоша қилишга ташриф буюрган футбол мухлислари учун махсус тадбирлар режалаштириб қўйди. Бу ҳақда клуб матбуот хизмати хабар берди.
2017 йилда Ўзбекистон Олий лигаси доирасида бўлиб ўтадиган ҳар бир уй учрашуви доирасида мамлакатимизнинг энг совриндор жамоаси «Пахтакор» ишқибозларга катта совға тайёрламоқда, деб ёзилган хабарда. Бунда ҳар бир уй учрашувида алоҳида-алоҳида автомашина ўйналадими ёки бутун бир мавсум учун бир дона автомобиль — ойдинлик киритилмаган.
Мавсумий абонемент ёки чипта сотиб олган футбол мухлислари стадиондаги барча қулайликлардан фойдаланиши мумкин экани айтиб ўтилган. Бу қулайликлар нималардан иборат эканига ойдинлик киритилмаган. Қайд этиш керак, «Пахтакор» секторларининг усти қуёш ва ёмғирдан ҳимоя қилувчи мослама билан жиҳозланмаган. Мухлислар учун стадион ҳудудида ресторан, барлар, алоҳида хоналар йўқ. Ҳожатхонадан эса фойдаланиш мумкин.
Автомашина ҳақидаги хабарда унинг маркасига ойдинлик киритилмаган. Камолиддин Тожиев сурати бор баннерда эса Damas акс этган. Бу шунчаки расмми ёки чиндан ҳам Damas ўз эгаларини кутмоқдами — маълум эмас.
Аввалроқ Тошкентнинг «Локомотив» футбол клуби 55 ёшдан ошган мухлисларга учрашувларни бепул томоша қилиш имкониятини яратиб берганди. «Темирйўлчилар»нинг Чемпионлар лигаси доирасида камида учта халқаро ўйини бор. «Пахтакор» эса бу мусобақадан четда қолган.
Хабарда «Пахтакор» мамлакатнинг энг совриндор клуби эканига урғу берилган бўлиб, 2016 йил якунларига кўра шонли клуб энг кам мухлис тўплаган жамоалардан бири бўлгани очиқланмаган.
Изоҳ (0)