Париж марказидаги Лувр карусели савдо маркази постида хизматда бўлган ҳарбийга номаълум киши пичоқ билан ҳужум қилди. Бу ҳақда «Коммерсантъ» хабар бермоқда.
«Сантинель» операцияси доирасида фуқаролик объектларини ҳимоя қилаётган ҳарбий патруль номаълум шахсни текширувдан ўтказмоқчи бўлганида, у пичоқ чиқариб, ҳарбийларга ташланди. Ҳарбийлардан бирининг қўли енгил яраланиб, бош қисмидан жароҳат олди. Шундан сўнг, ҳарбийлар ўқ уза бошлади.
Воқеа жойига етиб келган Париж префектининг сўзларига кўра, жами беш бор ўқ узилган. Ҳужум қилган номаълум шахс оғир жароҳатланган.
Лувр каруселига ташриф буюрган 250 киши тезда эвакуация қилинган. Воқеа содир бўлган жойга махсус хизмат чақирилган. Номаълум шахснинг махсус мосламалар билан кўздан кечирилган сумкасидан портловчи модда ёки ўқ отиш қуролининг излари топилмади. Жиноятчи ҳибсга олиниб, касалхонага юборилди. Воқеа содир бўлган жой кузатувга олиниб, музей вақтинчалик ёпилди.
Кейинроқ ҳуқуқни ҳимоя қилиш ходимлари томонидан яна бир киши ҳужум қилган шахсга боғлиқ деган тахмин остида қўлга олинди. Франция ИИВ расмий вакили иккинчи шахснинг ушбу ҳодисадаги ўрни прокуратура томонидан аниқлаштирилишини маълум қилди.
Франция бош вазири Бернар Казнёв мазкур ҳужум террористик характерга эга эканлигини қайд этди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)