Parij markazidagi Luvr karuseli savdo markazi postida xizmatda bo‘lgan harbiyga noma’lum kishi pichoq bilan hujum qildi. Bu haqda “Kommersant” xabar bermoqda.
“Santinel” operatsiyasi doirasida fuqarolik obyektlarini himoya qilayotgan harbiy patrul noma’lum shaxsni tekshiruvdan o‘tkazmoqchi bo‘lganida, u pichoq chiqarib, harbiylarga tashlandi. Harbiylardan birining qo‘li yengil yaralanib, bosh qismidan jarohat oldi. Shundan so‘ng, harbiylar o‘q uza boshladi.
Voqea joyiga yetib kelgan Parij prefektining so‘zlariga ko‘ra, jami besh bor o‘q uzilgan. Hujum qilgan noma’lum shaxs og‘ir jarohatlangan.
Luvr karuseliga tashrif buyurgan 250 kishi tezda evakuatsiya qilingan. Voqea sodir bo‘lgan joyga maxsus xizmat chaqirilgan. Noma’lum shaxsning maxsus moslamalar bilan ko‘zdan kechirilgan sumkasidan portlovchi modda yoki o‘q otish qurolining izlari topilmadi. Jinoyatchi hibsga olinib, kasalxonaga yuborildi. Voqea sodir bo‘lgan joy kuzatuvga olinib, muzey vaqtinchalik yopildi.
Keyinroq huquqni himoya qilish xodimlari tomonidan yana bir kishi hujum qilgan shaxsga bog‘liq degan taxmin ostida qo‘lga olindi. Fransiya IIV rasmiy vakili ikkinchi shaxsning ushbu hodisadagi o‘rni prokuratura tomonidan aniqlashtirilishini ma’lum qildi.
Fransiya bosh vaziri Bernar Kaznyov mazkur hujum terroristik xarakterga ega ekanligini qayd etdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)