Эрон мудофаа вазири Ҳусайн Деҳқон мамлакат 29 январь куни ўрта масофага мўлжалланган ракета синовини ўтказганини маълум қилди, дея хабар бермоқда Meduza.
Унинг сўзларига кўра, бу синов Эрон ядровий дастури бўйича келишув талабларини ёки БМТнинг 2231 сонли резолюцияси шартларини бузмайди (мазкур резолюцияга мувофиқ, Эрон баллистик ракеталарни учиришдан воз кечиши керак).
«Биз ўз мудофаамиз масалаларига бегоналарнинг аралашишига йўл қўймаймиз», — дея қўшимча қилди Деҳқон.
30 январь куни АҚШ Мудофаа вазирлигидаги манбалар Эрон навбатдаги баллистик ракета синовини ўтказганини маълум қилди. АҚШ расмий вакиллари, жумладан, мамлакатнинг БМТдаги доимий вакили Никки Хейли бу синовларни «номақбул» деб атади.
БМТнинг 2231 сонли резолюцияси Эрондан ядровий каллакларни таший оладиган баллистик ракеталар ишлаб чиқишдан воз кечиш ва «баллистик ракета технологияларидан фойдаланилган» қурилмаларни учиришни тўхтатишни талаб қилади.
Эрон ҳукумати ядровий қурол мамлакат мудофаа доктринасининг бир қисми эмаслиги ва улар ишлаб чиқаётган ракеталар ядровий каллакларни таший олмаслигини таъкидлаб келади.
АҚШ президенти Дональд Трамп сайловолди кампанияси давомида Эрон ядровий дастури борасида келишувга эришгани учун Барак Обама маъмуриятини танқид остига олган ва Эроннинг баллистик ракеталар дастурини ёпишга эришишни ваъда қилган эди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)