Германия пойтахти Берлинда «Яшил ҳафта – 2017» қишлоқ хўжалиги маҳсулотлари халқаро ярмаркаси давом этмоқда. Унда Ўзбекистон компания ва корхоналари ўз маҳсулотлари ва хизматлари билан иштирок этмоқда, деб хабар беради ЎзА.
«Ўзагроэкспорт» акциядорлик жамияти маълумотига кўра, ўзбекистонлик тадбиркорлар «Яшил ҳафта – 2017» халқаро ярмаркасида 27 январгача Хитой, Жанубий Корея, Буюк Британия, Бирлашган Араб Амирликлари, Германия, Австрия, Ҳиндистон, Туркия каби давлатларнинг фирма ва компаниялари билан жами 151,2 миллион долларлик экспорт шартномалари имзолади.
Ўзбекистон бош вазирининг ўринбосари, қишлоқ ва сув хўжалиги вазири Зоир Мирзаев раҳбарлигидаги Ўзбекистон делегацияси халқаро ярмарка иштирокчилари билан ўзаро алоқа ўрнатиш ва ҳамкорликни ривожлантиришга оид музокаралар олиб бормоқда.
70 га яқин мамлакатдан 1650 фирма ва компания иштирок этаётган мазкур халқаро форумда қишлоқ хўжалиги маҳсулотлари, уларни етиштириш ва қайта ишлашга оид энг сўнгги ютуқлар намойиш этилмоқда.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)