Венесуэла президенти Николас Мадуро номинали 100 боливарга тенг энг йирик купюрани муомаладан чиқаришни кейинга қолдиришга қарор қилди, деб ёзади «Интерфакс». У ушбу қарорни мамлакатни қамраб олган иқтисодий тартибсизлик билан изоҳлади. Мадуро вазиятни «халқаро саботаж» натижаси деб атади.
Банкноталарни 2 январгача ишлатишга рухсат берилди, дастлаб эса уларни 20 декабрь, сешанба куни шу қийматдаги тангаларга алмаштириш режалаштирилган эди. Буни фақат мамлакатнинг марказий банкида амалга ошириш мумкин. Унинг бўлинмаларида катта навбатлар юзага келди, чунки аҳолининг учдан бир қисмидан кўпроғида фақат нақд пул бор, шунинг учун, агар улар купюраларни тангаларга алмаштиришга улгурмаса, ишлаб топилган пуллар йўққа чиқади.
Минглаб дўконлар маблағлар етишмаслиги туфайли ёпилди, одамлар бир неча кундан буён озиқ-овқат сотиб ололмади. Натижада мамлакат шарқида оммавий тартибсизликлар, босқинчиликлар ва қирғинлар бошланди, полиция куч ишлатишига тўғри келди.
Изоҳ (0)